Икона Божией Матери Неупиваемая чашаБожией Матери Неупиваемая чаша
Акафист Божией Матери Неупиваемая Чаша
Кондак 1
Избранное и дивное нам избавление даровася Твой образ честный, Владычице Богородице: яко избавльшеся явлением его от недугов душевных и телесных и скорбных обстоянии, благодарственная благохваления приносим Ти, Всемилосердная Заступнице. Ты же, Владычице, Неупиваемою Чашею нами именуемая, приклонися благоутробно к нашим воздыханием и воплем сердечным и избави страждущих недугом пианства, да с верою воззовем Ти: Радуйся, Владычице, Неупиваемая Чаше, духовную нашу жажду утоляющая.
Икос 1
Ангельстии чини и праведников сонми непрестанно славят Тя, Царицу всех Богородицу, ходатайствующую о многогрешнем роде христианстем, погрязшем в беззакониих, пребывающем во гресех: даруеши бо ему во утешение и спасение милость Свою чрез многоименныя чудотворныя иконы Твоя, ихже яко звезды небесныя по всей земли нашей зрим. К единому же от сих образу, Неупиваемая Чаша именуемому, припадающе, из глубины сердца взываем Ти: Радуйся, неприступнаго Божества селение; радуйся, непрестанное людей удивление. Радуйся, скорбьми немощи наша очищающая; радуйся, милость Свою чрез чудотворныя иконы Твоя нам низпосылающая. Радуйся, явлением тех скорбная сердца наша возвеселяющая; радуйся, благодарственная Богу пети научающая. Радуйся, пречудное всех к Богу примирение; радуйся, геенны вечныя избавление. Радуйся, Владычице, Неупиваемая Чаше, духовную нашу жажду утоляющая.
Кондак 2
Видящи, Пресвятая Владычице, сердечныя скорби, душевныя муки и искреннее покаяние людей, одержимых недугом, губительною болезнию пианства, благоволила еси явити богоспасаемому граду Серпухову милость Твою явлением пречуднаго образа Твоего, именуемаго Неупиваемая Чаша, да вси к нему припадающии с верою и сокрушенным сердцем, получивше исцеление от тяжкаго недуга своего, из глубины души вопиют: Аллилуия.
Икос 2
Разум неудобь разумеваемый трикратнаго явления преподобного Варлаама и повеления его путьшествовати в богоспасаемый град Серпухов разумети ища, человек некий, страждущий недугом пианства, отъиде во град Серпухов и обрете тамо во монастыре Владычнем икону Твою святую, Неупиваемая Чаша именуемую. Мы же, видяще таковое Твое о нас, грешных, попечение, с благоговением вопием Ти: Радуйся, чрез благочестивых людей славу чудес Твоих грешником открывающая; радуйся, Путеводительнице прозорливая, путь спасения им показующая. Радуйся, всеблагая наша Наставнице, любовию Твоею нас привлекающая; радуйся, за вся благодеяния Твоя благодарению нас научающая. Радуйся, скорбь нашу в радость претворяющая; радуйся, несумненною надеждою нас увеселяющая. Радуйся, губительныя страсти наша разрушающая; радуйся, благим намерением способствующая. Радуйся, Владычице, Неупиваемая Чаше, духовную нашу жажду утоляющая.
Кондак 3
Сила Вышняго благодатию Владычицы укрепи некоего человека, страждущаго недугом пианства, егда он, нозе разслабленныя имый, иде во град Серпухов, повеление Богоматере, чрез преподобнаго Варлаама возвещенное, исполняя, и обрет Пречистыя Богоматере икону, абие исцеле от недуга своего душевнаго и телеснаго и из глубины души воззва Богу: Аллилуия.
Икос 3
Имуще источник неоскудный и неупиваемую чашу небесных дарований, не токмо людие града Серпухова, но и вси православнии христиане от иных градов и весей к Твоему пречудному образу притекают и, пред ним получающе исцеление, припадающе, благодарственными усты вопиют Ти: Радуйся, Купеле, в нейже вся наша скорби погружаются; радуйся, Чаше, еюже радость спасения нашего восприемлем. Радуйся, немощи наша телесныя врачующая; радуйся, язвы греховныя исцеляющая. Радуйся, страсти наша силою молитв Твоих укрощающая; радуйся, коемуждо просящему по потребе его подающая. Радуйся, милостей сокровище нам открывающая; радуйся, едина Мати, милосердие нам являющая. Радуйся, Владычице, Неупиваемая Чаше, духовную нашу жажду утоляющая.
Кондак 4
Бурю внутрь имуще помышлений сумнительных, но с искренним покаянием притекающе к Твоему неизреченному милосердию, одержимии пианственною страстию получают исцеление и из глубины сердца вопиют Ти: Аллилуия.
Икос 4
Слыша Господь тяжкия скорби жен, стариц и детей, ихже сродницы обуреваеми суть пианственною страстию, дарова им Твою, Владычице, икону, у неяже вси притекающии обретают утешение и радость духовную и вопиют Ти со слезами: Радуйся, Агнице, рождшая Агнца, вземлющаго грехи мира; радуйся, Чаше, черплющая нам радость от источника безсмертия. Радуйся, скорбных матерей утешение, ненадежных надежде; радуйся, скорбящих отрадо. Радуйся, благодати явление; радуйся, веры утверждение. Радуйся, волнение страстей утишающая; радуйся, руку помощи Твоея требующим простирающая. Радуйся, Владычице, Неупиваемая Чаше, духовную нашу жажду утоляющая.
Кондак 5
Боготечную звезду, честную икону Твою показала еси нам, Владычице, юже зряще и с верою сердечною молящеся Тебе, Богородице, глаголем: исцели пианственною и всякою иною болезнию души и тела страждущих, верных же научи воспевати хвалу Богу: Аллилуия.
Икос 5
Видяще чудеса преславная и знамения пречудная, бываемая не токмо от иконы Твоея, Богомати, во граде Серпухове явленныя, но и от всех по подобию сея иконы написанных изображений, припадающе к ним смиренно, вопием Ти: Радуйся, скоропредстательная Помощнице усердно к Тебе притекающих; радуйся, благосердая Услышательнице молений наших. Радуйся, град Серпухов благословением Твоим осенившая; радуйся, и в пределах Московских славу чудес Твоих показавшая. Радуйся, серпуховская Владычице, сокровище исцелении неоскудное; радуйся, инокинь тамо благо подвизающихся всемощная покровительнице. Радуйся, ведущим брань противу мира, плоти и диавола добрая поспешнице; радуйся, и в мире благочестно живущих усердная Заступнице. Радуйся, Владычице, Неупиваемая Чаше, духовную нашу жажду утоляющая.
Кондак 6
Проповедающе чудеса Твоя, Богородительнице, от иконы Твоея, Неупиваемая Чаша именуемыя, бываемая, молим Тя, Пречистая, со слезами: избави всех нас от падений греховных, научающи воспевати Богу: Аллилуия.
Икос 6
Возсияла еси в светлости Божественныя славы, Дево Богородице, на Младенца Предвечнаго Господа нашего Иисуса Христа зрящая, Иже в сосуде аки в неупиваемой чаше предстоит, якоже Тя видим, изображенную на иконе Твоей, Неупиваемая Чаша таинственно нареченной, от неяже избавление пианственныя болезни притекающим с верою даруеши, во еже пети Тебе гласы немолчными сице: Радуйся, о Нейже радуется и торжествует Ангельский собор и человеческий род; радуйся, Еяже слава превосходит похвалы земныя и небёсныя. Радуйся, таинственным изображением Сына в сосуде тайну Божёственныя Евхаристии нам открывающая; радуйся, рожденнаго Тобою Агнца, всегда ядомаго и никогдаже иждиваемаго, нам указующая. Радуйся, Чашею Жизни и безсмертия ко вратам Вёчныя Жизни нас приводящая; радуйся, источником нетления и радости жаждущия души напаяющая. Радуйся, неисчетною благостынею не оставляющая презреннеиших и отверженнейших; радуйся, от рова погибели сердоболием, Твоим исхищающая ненадёжных. Радуйся, Владычице, Неупиваемая Чаше, духовную нашу жажду утоляющая.
Кондак 7
Хотя некии человек возблагодарити Тя, Владычице, за исцеление от пианственнаго недуга, украси Твою пречудную, Богомати, икону, во граде Серпухове пребывающую, из глубины сердца воспевая Богу: Аллилуия.
Икос 7
Новое чудо видим, Владычице, от иконы Твоея святыя: страждущии бо пианственным недугом некии раб Божии Стефан, прибегая к Твоему Матернему предстательству, от тяжкаго недуга своего избавися и, благодаря Тя, благолепными дарами икону Твою украси, и, припадая к неи, со слезами возопи Тебе тако: Радуйся, живоносный источнике исцелении; радуйся, чаше небесная божественных даровании. Радуйся, реко исцелении приснотекущая; радуйся, море, всех наших страстей потопление. Радуйся, благодарственная приношения не отвергающая; радуйся, сердца благочестивых людей возвеселяющая. Радуйся, крепкия веры Подательнице; радуйся, всех благих деянии Исполнительнице. Радуйся, Владычице, Неупиваемая Чаше, духовную нашу жажду утоляющая.
Кондак 8
Странно и сумнительно неверующим слышати, како икона Твоя святая «Неупиваемая Чаша» божественных исцелении источает чудеса. Мы же, верующе словеси Твоему, Владычице, реченному к первописаннои иконе: «С тобою Моя благодать и сила», — веруем, яко от сея иконы Твоея благодать Твоя выну истекает. Темже, благоговейно покланяющеся, лобызаем ю, вопиюще Богу: Аллилуия.
Икос 8
Всё упование людие, страждущии болёзнию пианства, на Тя, Владычице, возлагают, прекланяешися бо немощем и страстем нашим. Кто бо нас, грешных, изведёт из рова погибели и нищеты духовныя и телесныя, аще не Ты, Владычице! Сего ради прекланяем колена пред Твоим пречудным образом и вопием Ти тако: Радуйся, по молитве грешных людей, призывающих Тя в помощь свою, небесную благодать низпосылающая; Радуйся, глубину милосердия Твоего грешным показующая. Радуйся, доблести и веры богатство неистощимое; радуйся, духа уныния и боязни отгнание. Радуйся, отчаявшихся и ненадёжных ободряющая; радуйся, удручённым болёзнию пианства руку помощи простирающая. Радуйся, терпеливых страдальцев дарми благодатными утешающая; радуйся, суетныя радости мира сего презирати нас научающая. Радуйся, Владычице, Неупиваемая Чаше, духовную нашу жажду утоляющая.
Кондак 9
Всякое естество ангельское удивися делу Твоего милосердия, Господи, яко даровал еси грешному роду человеческому Заступницу и Помощницу, к нашим немощем прекланяющуюся, от недуга пианства свобождающую, верныя же научающую пёти Ти: Аллилуия.
Икос 9
Вития человечестии недоумеют хвалити, славная Владычице, Твоея иконы праздник, ниже от скверных устен наших приносимыя Тебе похвалы достойны суть, обаче неисчетная благодеяния, иконою Твоею являемая, видевше, душею и сердцем радующеся, Ти глаголем: Радуйся, яко от лика Твоего чудеса деются; радуйся, отвергающих Тя посрамление. Радуйся, от всякаго зла прибегающих к Тебе избавляющая; радуйся, кротким сиянием Твоим мрак грехов и страстей наших разгоняющая. Радуйся, свеще неугасимая, веры огнь воспламеняющая; радуйся, Благодатная, яко Тобою с нами Бог. Радуйся, добраго ответа нам пред Судиёю Праведным усердная Ходатаице; радуйся, души православных любовию к Тебе и Сыну Твоему исполняющая. Радуйся, Владычице, Неупиваемая Чаше, духовную нашу жажду утоляющая.
Кондак 10
Спасти хотящи люди многия, страждущия недугом пианства, чудную Твою, Богомати, икону нам даровала еси, сего ради одержимии сим недугом к чудотворному образу Твоему притекают и, получивше исцеление, умильно Богу зовут: Аллилуия.
Икос 10
Стена еси и щит, Богомати, людем, пианственною болёзнию страждущим и всём усердно к Тебе притекающим и икону Твою благоговейно чтущим, ибо сию дарова нам благих податель Господь в помощь и врачевание еяже ради внушает нам пёти: Радуйся, отчаянных надежде, печали их утоляющая; Радуйся, Твоею благодатию нас недостойных осиявающая. Радуйся, нашу скверну чистотою Твоею очищающая; радуйся, брёние наше тлённое в нетление обращающая. Радуйся, неможение наше утверждающая; радуйся, облежащии нас облак страстей скоро разгоняющая. Радуйся, от уныния тяжкаго нас избавляющая; радуйся, в молитве ко Творцу всяческих нас укрепляющая. Радуйся, Владычице, Неупиваемая Чаше, духовную нашу жажду утоляющая.
Кондак 11
Пения нашего смиреннаго, от полноты любве и усердия Тебе приносимое, не презри, Чистая, и не отвратися отчаявшихся и страждущих недугом пианства людей, но помози им же и нам очиститися от всякия скверны греховныя, да возможем достоино и праведно пёти Богу: Аллилуия.
Икос 11
Светоприемную свещу зрим Тя, Пресвятая Дёво, и на святей иконе Твоей, посреде лика угодников Твоих, лучами благодати неизречённо блистающу, отнюдуже, во мраце грехов своих просвещеннии и на светлую стезю добродетелей наставляемии, зовём Тя почитании сими: Радуйся, заступлёнием Домники преподобныя избавляющая нас от суеты мира сего многомятежнаго; радуйся, тоя предстательством помогающая нам в борьбе с прираженьми страстей плотских. Радуйся, молитвами священномученика Харалампия мысль благую в сердце нашем полагающая; Радуйся, того ходатайством нечистую совесть просвещающая. Радуйся, молитвами Параскевы мученицы от мучительнаго недуга пианства страждущих избавляющая; радуйся, тоя заступлёнием страждущих к искреннему раскаянию и вразумлению призывающая. Радуйся, купно со священномучеником Антипою озлобленных всех души умягчающая; радуйся, вкупе с ним на помощь Тя призывающих и имя Твоё славящих спасающая. Радуйся, Владычице, Неупиваемая Чаше, духовную нашу жажду утоляющая.
Кондак 12
Благодать Божия, присущая святей иконе, Неупиваемая Чаша именуемой, влечёт к неи, Владычице, всех скорбящих, плачущих, обездоленных, вдов и сирот, наипаче же всех страждущих недугом пианства, и не тщи отходят, Владычице, от неупиваемыя чаши Твоих Божественных даровании, но, неоскудно получающе цельбы от чудотворнаго образа Твоего, Всеблагая, благодарственно поют Богу: Аллилуия.
Икос 12
Поюще Твоя чудеса и велию милость, людей, одержимым пианственною страстию, явленная, молим Тя, Владычице: спаси и помилуй и не остави нас, ищущих Твоего предстательства и зовущих Ти: Радуйся, воистинну бедным Помощнице; радуйся, страждущих присное врачевство. Радуйся, благодушных велия радосте; радуйся, малодушных дивное ободрение. Радуйся, бед и скорбен скорая Избавительнице; радуйся, верных всемилостивая Утешительнице. Радуйся, гордых смиряющая; радуйся, смирённыя возвышающая и всём спасения желающая. Радуйся, Владычице, Неупиваемая Чаше, духовную нашу жажду утоляющая.
Кондак 13
О Премилосердая Сладчайшаго Господа нашего Иисуса Христа Мати, нынешнее услыши наше моление и избави нас от всех недугов душевных и телесных, наипаче же свободи страждущих недугом пианства, да благодарственно вопием Богу: Аллилуия.
Этот кондак читается трижды, затем 1-и икос «Ангелъстии чини.» и 1-и кондак «Избранное и дивное».
Образ Божией Матери Неупиваемая чаша
Царице наша Преблагая, надежде наша, Пресвятая Богородице, приятелище сирых и странных Заступнице, бедствующим помоще и озлобляемых покрове. Зриши нашу напасть, зриши нашу скорбь, отовсюду искушеньми одержими есмы, и несть избавляли.
Ты убо Сама помози нам, яко немощным, окорми нас, яко странны, настави нас, яко заблудших, уврачуй и спаси нас, яко ненадёжных. Не имамы бо иныя помощи, ни иного предстательства, ни утешения, токмо Тебе, о Мати всех скорбящих и обременённых.
Призри на нас, грешных и во озлоблении сущих, покрый нас пречистым омофором Твоим, да избавлени будем от зол, обышедших нас, наипаче же от пианства, да восхвалим всегда пресвятое имя Твоё. Аминь.
Днесь притецем, вернии, к божественному и пречудному образу Пресвятыя Богоматере, напаяющия сердца верных неупиваемою чашею небеснаго Своего милосердия и людем верным чудеса показующия, яже видяще и слышаще духовно празднуем и тепле вопием: Владычице милосердая, исцели наша недуги и страсти, молящи Сына Твоего, Христа Бога нашего, и спаси души наша.